Հայ համայնքի արմատները հետագծելիս այս գիրքը վերհանում է Սիվասի (Սեբաստիա) բազմամշակույթ ժառանգությունը: Սիվասը, որը գտնվում է Անատոլիայի սրտում և սփռված է հսկայական աշխարհագրական տարածքում՝ իր ենթաշրջաններով, որոնք տարբեր են, սակայն լրացնում են միմյանց, կարող է ամբողջությամբ ընկալվել միայն բազմամշակույթ ժառանգության համատեքստում:

Գրքի բովանդակությունը կազմում են Հրանտ Դինք հիմնադրամի կողմից Սիվասի վերաբերյալ իրականացված հետազոտության արդյունքները։ Հուսով ենք, որ այստեղ ներկայացված տեղեկությունները կհետաքրքրեն ոչ միայն հետազոտողներին և պատմության սիրահարներին, այլև յուրաքանչյուրին, ով ցանկանում է ավելին իմանալ Սիվասի մասին: Սիվասի սահմանները հյուսիսում հասնում են մինչև Սև ծով, հարավում՝ Հալեպ, արևելքում՝ Եփրատ, արևմուտքում՝ Կապադովկիա:

Հսկայական աշխարհագրությունը առանձնահատկություններ է ստեղծում շրջաններում, և մենք փորձել ենք ուշադրություն հատկացնել դրանցից յուրաքանչյուրին: Սիվասը հասկանալու համար հարկավոր է Սուշեհրիից գնալ Գյուրուն, Ուլաշից Շարքըշլա՝ Հաֆիքը և Զարան դիտարկելով առանձին: Այս սփռված շրջանների քաղաքները՝ Գեմերեքի Չեփնին և Քանգալի Մանջըլըքը պետք է համարել առանձին վայրեր, իսկ Դիվրիղիի գյուղերից յուրաքանչյուրը պետք է մանրակրկիտ ուսումնասիրել առանձին-առանձին։ Մեր ուսումնասիրության արդյունքները ներկայացնելիս նշել ենք նաև մեզ հանդիպած մարտահրավերները և տպավորությունները, որ ստացել ենք մոռացման սպառնալիքի առաջ կանգնած մշակութային ժառանգության հետազոտման ընթացքում։ Դրանով նպատակ ունենք նպաստելու նույնանման թեմաների ուսումնասիրության ժամանակ անցկացվող մեթոդաբանական քննարկումներին: