Հարգարժան ընկերներ,

Դիարբեքիրի փաստաբանների միության անունից ցանկանում եմ շնորհակալություն հայտնել ժյուրիի անդամներին Հրանտ Դինքի անվան մրցանակը Միությանը շնորհելու համար։ Ամենամյա այս մրցանակը տրվում է անձանց կամ կազմակերպությունների, որոնց գործունեությունը միտված է արդարությանն ու ազատությանը, որոնք պայքարում են հանուն մարդու իրավունքների ու ձգտում մի աշխարհի, որտեղ գերակայում է խաղաղությունը։ 

Իր հիմնադրումից ի վեր Դիարբեքիրի փաստաբանների միությունը եղել է իրաբանական ու հասարակական կազմակերպություն, որը համառորեն շարունակել է համընդհանուր մարդու իրավունքներին համապատասխան՝ իրավունքների ու իրավունքի գերակայության համար իր պայքարը՝ հեռու պահելով իրեն իշխանական բոլոր շրջանակներից։ Այն ձգտել է մնայուն խաղաղության՝ այս պայքարում կորցնելով իր ամենաթանկ անդամներին։ Իր պատմական պարտականությունն է համարել զորակցել ճնշվածներին։ Չնայած բոլոր ճնշումներին ու լուրջ գործընթացներին, որոնք հանգեցրել են իր անդամների ազատազրկումներին, խոշտանգումներին ու նույնիսկ՝ սպանդին՝ Դիարբեքիրի փաստաբանների միությունը երբեք չի նահանջել հանուն մարդու իրավունքների իր պայքարից։ Այն միշտ պաշտպանել է այն ամենը, ինչը ճիշտ է արդարության վերականգնման համար, միշտ կանգնել է ողջ երկրում անարդարության զոհ դարձած մարդկանց կողքին։ Քաղաքական նկատառումներից իրեն հեռու պահելով՝ Փաստաբանների միությունը բռնել է ազատության ու արդարության կողմը, որոնք մարդկության ամենահիմնարար կարիքներն են։ Սնվելով իր պատմությունից ու ուժ քաղելով Թահիր Էլչիի թողած հպարտ ժառանգությունից՝ Միությունն այսօր կրկին անգամ բռնում է ճնշվածների կողմը և շարունակելու է նույնն անել ապագայում։

Եվս մեկ անգամ ուզում եմ երախտագիտությամբ հիշել, հարգանքիս հավաստիքը տալ ու փայփայել Փաստաբանների միության սիրելի նախագահ Թահիր Էլչիի հիշատակը, որն իր ամբողջ կյանքը նվիրեց արդարության, իրավունքների, խաղաղության, եղբայրության ու ազատության համար պայքարին ու հենց այդ պայքարին էլ տվեց իր կյանքը։ Թահիր Էլչին իր կյանքը նվիրաբերեց գտնելու սանձազերծողներին այն բռնությունների, որոնց զոհերն իրենց ծնողների, ամուսինների ու երեխաների աչքի առջև բռնի առևանգված, խոշտանգված կամ սպանված ու ամայության մեջ անտեր նետված մարդիկն էին։ Թահիր Էլչին մարդու իրավունքների անխոնջ ջատագով էր, որը երբեք որևէ բանից չէր վախենում իր ողջ պայքարի ընթացքում, մտավորական էր, որը մինչև իր վերջին շունչը խոսում էր խաղաղությունից և որի ուժը սնվում էր այն մարդկանց երազանքից, ովքեր երազում են համատեղ ապրել խաղաղության ու ազատության մեջ։

Ճնշվածների պատմությունը մարդկության պայքարի պատմությունն է։ Այս պատմությունը նաև այն մարդկանց պատմությունն է, ովքեր պայքարում են հանուն մարդկության, ովքեր երբեք մոռացության չեն մատնվի և հավերժ կհիշվեն երախտագիտությամբ։ Ահա՛  իրավունքների ջատագով, հերոս երկու մարդ, որոնք ստեղծեցին մարդկության պատմությունը՝ Հրանտ Դինք ու Թահիր Էլչի։ Նրանք ոչ միայն երկու եղբայրական ու ճնշված համայնքների որդիներ են, որոնք վաղեմի ու մոտ անցյալում ենթարկվել են ջարդերի, նրանք նաև այն արժանավորներն են, որոնք մարդկության հպարտությունն են՝ բոլոր ճնշվածների կողքին կանգնելու իրենց մարդկային քայլով։ Չնայած այն քաղաքական շրջանակներին, որոնք գործի են դնում էժանագին ու խտրական դիսկուրս ու վերաբերմունք, Թահիր Էլչին ու Հրանտ Դինքը մարդկանց կողմից հիշվում են իբրև մտավորականներ, որոնք ջանք չխնայեցին Թուրքիայի համայնքների՝ ժողովրդավարական համակարգում ապրելու համար, ովքեր բացի իրավունքներից ու արդարությունից՝ որևէ այլ միջոց ճիշտ չհամարեցին։ Նրանց սպանությունը պատվիրողները երևի մտածում էին, թե նրանց հզոր ժառանգությունը կխամրի, որ մենք նրանց հետքերով չենք գնա, և նրանք սխալվեցին։ 

Վերջին մեկուկես տարում Շըրնաքի, Սուրի, Սիլվանի, Ջիզրեի, Իդիլի, Յուքսեկովայի և Նուսայբինի բախումների ընթացքում տեղ են գտել մարդու հիմնարար իրավունքների ու ազատությունների լրջագույն խախտումներ՝ մասնավորապես՝ կյանքի իրավունքի։ Հուլիսի 15-ի ռազմական հեղաշրջման փորձից հետո ամբողջ Թուրքիայում հայտարարվեց արտակարգ դրություն, Մարդու իրավունքների եվրոպական կոնվենցիայի կիրառությունը ժամանակավորապես կասեցվեց, երկիրը սկսեց կառավարվել օրենքի ուժ ստացած կառավարական որոշումներով, որոնք սառեցրին օրենսդիր մարմնի գործունեությունը։ Հանրության բոլոր հատվածներում սկսեցին տիրել լուրջ մտահոգություններ ու վախ, մարդկանց անվտանգությունն ու իրավունքի գերակայությունը լրջորեն տուժեցին։  

Իբրև Դիարբեքիրի փաստաբանների միություն ուզում ենք ևս մեկ անգամ կրկնել, որ Թուրքիայում խնդիրները կարող են լուծվել համընդհանուր ժողովրդավարական հողի վրա, որը կմիավորի հասարակության բոլոր հատվածները իրավունքի դաշտի վրա։

Այս պահին մեր հիմնարար պարտականությունն ու պատմական պատասխանատվությունն է ոչ միայն պաշտպանել, այլև հարստացնել Թահիր Էլչիի ու Հրանտ Դինքի կողմից մեզ շնորհված ժառանգությունը։ Սրան հասնելու միակ ճանապարհը խաղաղություն պահանջելն ու խաղաղություն ստեղծելու համար մեր ձայնը բարձրացնելն է։ 

Ահմետ Օզմեն՝ Դիարբեքիրի փաստաբանների միության անունից։