Էրեն Քեսքինը ծնվել է 1959 թ. ապրիլի 24-ին Բուրսա քաղաքում։ Հայրը քուրդ է, իսկ մայրը՝ չերքեզ։ Ընտանիքի ազդեցությամբ՝ նրա մոտ համակրանք է ձևավորվել ձախական քաղաքականության նկատմամբ։ Սովորելով Ստամբուլի համալսարանի Իրավագիտության ֆակուլտետում՝ նա իրականացրել է փաստաբան դառնալու իր երազանքն ու սկսել քաղաքական ուղղվածություն ունեցող դատական գործեր վարելու պրակտիկան։ Նա 1989 թվականից անդամակցում է Մարդու իրավունքների միությանը, ինչ-որ ժամանակ ստանձնել է նաև միության նախագահի պաշտոնը։

1990-ականներին հաստատված ռազմական դրության ժամանակ, երբ քրդաբնակ տարածաշրջաններում պետականորեն իրականացվում էր պարեկային ռեժիմ, հովանավորվում էին գույքի հրկիզումները, չբացահայտվող սպանություններն ու մարդկանց անհետացումները, նա անդամակցում էր տարածաշրջանում մարդու իրավունքների աղաղակող ոտնահարումների դեմ պայքարող կոմիտեների։ Տարածաշրջան կատարած իր այցերի ժամանակ նա ենթարկվել է բանավոր և ֆիզիկական, ներառյալ՝ զինված հարձակումների։

1990-ականների ընթացքում գրեթե 200 գործ է հարուցվում նրա դեմ, իսկ 1995 թվականին նա մեղադրվում է դրանցից մեկով։ Նա վեց ամիս ժամկետով ազատազրկվում է թուրքական «Ազատ օրակարգ» (Օզգյուր Գյունդեմ) օրաթերթում իր հրապարակած «Աշխարհը պարտք է քուրդ ժողովրդին» վերնագրով հոդվածում «Քուրդիստան» բառն օգտագործելու համար։ 

Քեսքինը պայքարել է նաև կանանց նկատմամբ սեռական բռնության դեմ։ 1995 թվականի բանտարկության ընթացքում նա բացահայտել է, որ գրեթե բոլոր կանայք, որոնց մի մասը նախկինում իր պաշտպանյալներն են եղել, բանտում ենթարկվել են սեռական բռնության։ 1997 թվականին ազատ արձակվելուց հետո այս խնդրին անդրադառնալու նպատակով նա հիմնել է Կալանավայրերում սեռական բռնության և բռնաբարության դեմ իրավական աջակցության գրասենյակը։ Քսան տարվա ընթացքում գրասենյակն աջակցել է հարյուրավոր կանանց և մինչ օրս շարունակում է գործել։

2002 թվականին Գերմանիայում իր ելույթներից մեկում նա անդրադառնում է պետական համակարգում տեղի ունեցող սեռական կտտանքներին, ինչի առնչությամբ նրա դեմ հարուցվում է քրեական գործ «Թուրքական զինված ուժերի բարոյական կերպարը վիրավորելու» հիմքով և նա դատապարտվում է տասն ամսվա ազատազրկման։ Ազատազրկումը փոխարինվում է տուգանքով, որը վճարվում է Մարդու իրավունքների միությանը կատարված հանգանակություններից։ Նույն տարվա ընթացքում Թուրքիայի փաստաբանների միության կարգապահական խորհուրդը մեկ տարի ժամկետով կասեցնում է նրա փաստաբանական գործունեությունը։ Այս ընթացքում լայն տարածում ունեցող լրատվամիջոցները վարկաբեկիչ արշավ են սկսում նրա անձի դեմ։

Ծանր ճնշումների տակ հայտնված «Օզգյուր Գյունդեմ» օրաթերթին աջակցելու նպատակով նա երեք տարի շարունակ հանդես է գալիս որպես օրաթերթի գլխավոր համախմբագիր։ Այսօր նրա դեմ հարուցված է 143 գործ, որոնցից մեկի հիմքում իր ելույթներից մեկն է, իսկ մյուսները հարուցվել են այս կամավոր աշխատանքը ստանձնելու կապակցությամբ։

Նա խիզախորեն և անզիջում շարունակում է պաշտպանել Թուրքիայում մարդու իրավունքները՝ կանգնելով ոտնահարումներից տուժածների կողքին՝ սատարող հաստատությունների հիմնադրման, ինչպես նաև անհատական նախաձեռնությունների և ջանքերի միջոցով։ Կառավարությունը քննադատելու համար Քեսքինը բազմիցս ստացել է մահվան սպառնալիքիներ, ենթարկվել է ֆիզիկական հարձակումների, հայտնվել ատելության քարոզի հորձանուտում, այդուհանդերձ, նա շարունակում է վտանգի միջով անցնելով՝ բերել մարդու իրավունքների ոտնահարումները հանրային օրակարգ՝ հանուն Թուրքիայի ժողովրդի ու աշխարհում ապրող մարդկանց։