Ասենա Գյունալն իր բակալավրի աստիճանը ստացել է Միջին Արևելքի տեխնիկական համալսարանի միջազգային հարաբերությունների, իսկ մագիստրոսի աստիճանը՝ նույն համալսարանի սոցիոլոգիայի ֆակուլտետներից: Ասպիրանտի աստիճանը ստացել է 2008 թվականին Բողազիչի համալսարանում՝ ուսումնասիրելով հանրապետական Թուրքիայում պետություն-քաղաքացի փոխհարաբերությունները՝ առողջապահական քաղաքականության տեսանկյունից: 1998-2005 թվականներին աշխատել է որպես խմբագիր «Իլեթիշիմ» հրատարակչությունում: 2008 թվականի սեպտեմբերից ի վեր ծրագրերի համակարգող է աշխատում «ԴԵՊՈ»-ում՝ Ստամբուլի Թոփհանե թաղամասում գտնվող արվեստի և մշակույթի կենտրոնում։ Ա. Գյունալը Թուրքիայում արվեստի ոլորտի գրաքննության դեպքերի փաստագրման «Սիյահ Բանտ» (Սև ժապավեն) հետազոտական հարթակի համահիմնադիրն է: 2014 թվականին նա մասնակցել է Կոլումբիայի համալսարանի փորձի փոխանակման «AHDA» (Պատմական երկխոսության և հաշվետվողականության դաշինք) ծրագրին: 2018 թվականի մարտից ի վեր աշխատում է որպես «Անդոլու Քուլթուր»-ի գործադիր տնօրեն: Նա համահեղինակել է «Քաղաք, որը հիշում է. տեղանքն ու հիշողությունը՝ Թաքսիմից մինչև Սուլթանահմեթ» գիրքը (Memory Center/Հիշողության կենտրոն, 2019 թվական), ինչպես նաև համախմբագրել է «90'larda Türkiye'de Feminizm» գիրքըը («Ֆեմինիզմը 90-ականների Թուրքիայում», Իլեթիշիմ, 2002 թվական) և «Bir Daha Asla!: Geçmişle Yüzleşme ve Özür» («Այլևս երբեք. ներման հայցում և անցյալի հետ առերեսում», Իլեթիշիմ, 2013 թվական) գրքերը: 2019 թվականին Ա․ Գյունալն արժանացել է Մարդու իրավունքների և օրենքի գերակայության գերմանա-ֆրանսիական մրցանակին։

Ռուբեն Արևշատյանը արվեսստագետ, քննադատ և արվեստի համադրող է։ Նա Արվեստի քննադատների հայաստանյան ասոցիացիայի (AICA-Հայաստան) նախագահն է և դասավանդում է Երևանի Ժամանակակից արվեստի ինստիտուտում: Հեղինակել է բազմաթիվ հոդվածներ ժամանակակից արվեստի, ճարտարապետության և տեսության վերաբերյալ՝ հիմնականում հետսոցիալիստական համատեքստում քաղաքային և մշակութային փոխակերպումների խնդիրներին առնչվող թեմաների շուրջ: Արևշատյանը www.red-thread.org էլեկտրոնային ամսագրի խմբագրական կազմի անդամ է։ Համադրել և ներգրավված է եղել մի շարք նախագծերում, ինչպիսիք են «Մեծ ատրոֆիա», «Զուգահեռ իրականություն», «Տեղային արդիություններ», «Խորհրդային մոդեռնիզմ․ 1955-1991/Անհայտ պատմություն», «Արդիություններ առանց սահմանների», «Զուգահեռ արդիություն» (2014 թվականի Սան Պաուլուի բիենալեի շրջանակներում), «Վաղվա քաղաքը» (ճամփորդող ցուցահանդես, որը 2019-2020 թվականներին ցուցադրվել է Երևանի ճարտարապետության թանգարանում, Մինսկի արվեստների պալատում, Մոսկվայի Նոր Տրետյակովյան պատկերասրահում, 2011 թվականին համադրել է «Ձեռնարկներ. նոր համընդհանրության ենթակաները»՝ Հայաստանի ազգային տաղավարը Վենետիկի 54-րդ արվեստի բիենալեում, իսկ 2014 թվականին համադրել է «Իղձերի մայրաքաղաքը» Հայաստանի ազգային տաղավարը Վենետիկի 14-րդ ճարտարապետական բիենալեում: Հեղինակել և համադրել է «Քաղցր 60-ականներ/ Sweet 60s» միջազգային հետազոտական նախագիծը: 2017 թվականին STANDART ժամանակակից արվեստի տրիենալեին համագործակցող համադրող է եղել: Գեթթի հիմնադրամի «Պահպանելով արդին/Keeping it Modern» ծրագրի շրջանակներում ղեկավարել է Սևանի գրողների միության հանգստյան տան գիտական վերականգնման նախագիծը: