Ջանան Արընը ծնվել է 1942 թ. Անկարայում: Ստամբուլի համալսարանի իրավագիտության ֆակուլտետն ավարտելուց հետո նա հինգ տարի ուսանել է Լոնդոնի տնտեսագիտության դպրոցում՝ սահմանադրական իրավունքի բաժնում: 

1976 թ. նա վերադարձել է Թուրքիա՝ հիմնելով իրավաբանական գրասենյակ: 1980-ականներից ներգրավվել է կանանց շարժման մեջ, որ նոր թափ էր առնում այդ ընթացքում: Նա հանրային շահին ուղղված ծառայություններ էր մատուցում կանանց, ովքեր, լինելով բռնության ենթարկված կամ ամուսնալուծված, իրավաբանական օգնության կարիք ունեին: 1990 թ. 13 այլ կանանց հետ միասին նա հիմնադրել է «Մանուշակագույն տանիք» կանանց ապաստան-հիմնադրամը (Mor Çatı Kadın Sığınağı Vakfı)` կանանց նկատմամբ բռնության դեմ պայքարելու և կանանց շրջանում համախմբվածությունն ու աջակցությունը ամրապնդելու համար: 1997 թ. նա մասնակից է եղել Կին թեկնածուների աջակցման և վերապատրաստման ասոցիացիայի (KA.DER) հիմնադրմանը՝ խթանելով քաղաքականության մեջ կանանց ավելի լայնածավալ մասնակությունը և ներկայացվածությունը: Նա Ստամբուլի Իրավաբանների ասոցիացիայի Կանանց իրավունքների խթանման կենտրոնի համահիմնադիրներից է: Նա բազմաթիվ դասընթացներ, սեմինարներ է կազմակերպել այն փաստաբանների համար, ովքեր պաշտպանում են բռնության ենթարկված կանանց՝ տեղեկացնելով նրանց տղամարդկանց կողմից կանանց նկատմամբ գործադրվող բռնությունների, ինչպես նաև դատական գործընթացի ժամանակ նման կանանց հետ հաղորդակցվելու նրբությունների մասին: 1990-ականների սկզբին ԱՄՆ-ում գտնվելու ժամանակ, խրախուսվելով ՄԱԿ-ի որոշմամբ՝ նոյեմբերի 25-ը կանանց նկատմամբ բռնության վերացման միջազգային օր հայտարարելու մասին, նա ջանքեր ներդրեց այդ օրը Թուրքիայում համապատասխան հանդիպումներ անցկացնելու ուղղությամբ: Դրանք սկզբնական շրջանում անցկացվում էին «Mor Çatı»-ում, իսկ հետագայում արդեն ամբողջ երկրով մեկ:     

2011 թ. Անթալիայի իրավաբանների ասոցիացիայի կողմից կազմակերպված «Կանանց նկատմաբ բռնություն և կանանց իրավունքներ» խորագրով դասընթաց-սեմինարի ընթացքում նա իր ելույթի ժամանակ իր տեսակետն ավելի հասկանալի դարձնելու համար փորձել է ներկայացնել, որ վաղ ամուսնությունները տարածված երևույթ են եղել Թուրքիայի պատմության մեջ՝ անդրադառնալով Մուդամեդ մարգարեի ամուսնություններին և այդ ժամանակվա Թուրքիայի նախահագի ամուսնությանը: Մի խումբ տղամարդ փաստաբաններ, որ սեմինարին մասնակից չէին եղել, քրեական բողոք ներկայացրին նրա դեմ. նրան մեղադրանք ներկայացվեց «հանրայնորեն կրոնական արժեքները նվաստացնելու, իսլամի մարգարեին և նախագահին վիրավորելու, ինչպես նաև հանրությանը սադրելու մեջ»՝ մինչև հինգ տարի ազատազրկմամբ: 2012 թ. լուսադեմին ոստիկանությունը նրան ձերբակալեց Անթեփում (Այնթափ): Նրան ազատ արձակեցին հարցաքննությունից հետո: Նրա դեմ հարուցված գործն ավարտեց ո´չ ազատազրկմամբ, ո´չ դատավճիռով, ո´չ էլ արդարացմամբ, այլ քրեական գործի վարույթը կասեցվեց:  

Նա մասնակցել է անթիվ հարթակների գործունեությանը և նախաձեռնությունների: 1994-1997 թթ. անդամակցել է «Քայլ ընդդեմ կանանց նկատմամբ բռնության և ընտանեկան բռնության» փորձագետների խմբին (Եվրոպական խորհուրդի «GREVIO» խումբ): 1995 թ. նա մասնակցել է Պեկինում կայացած ՄԱԿ-ի կանանց հարցերով 4-րդ համաժողովին, իսկ 2000 թ.՝ Նյու Յորքում կայացած ՄԱԿ-ի գլխավոր ասամբլեայի «2000 թ. կանայք. գենդերային հավասարություն, զարգացում և խաղաղություն 21-րդ դարի համար»: 2005 թ. նա Կանանց նկատմամբ խտրականության վերացման հանձնաժողովի (CEDAW Committee) Թուրքիայում ստվերային ՀԿ-ների վերաբերյալ զեկույցի աշխատանքային խմբի անդամներից էր: 2012 թ. մեծապես նրա ջանքերի շնորհիվ Թուրքիան դարձավ առաջին երկիրը, որ վավերացրեց Ստամբուլյան կոնվենցիան, իսկ 2021 թ. սկզբին նրա շնորհիվ Թուրքիան ետ չկանգնեց կոնվենցիայից: 

Նա ուշադրություն է հրավիրում այն փաստին, որ դատական համակարգում կանանց իրավունքների խախտումները Թուրքիայում կանանց նկատմամբ բռնության աճի պատճառներից մեկն են: Նա օբյեկտիվորեն շարունակում է իր պայքարը օրենքի շրջանակներում՝ համառորեն, անկախ քաղաքական բևեռացումներից՝ հիմնվելով գիտական ուսումնասիրությունների և տվյալների վրա: Նա ջանքեր չի խնայում բարձրաձայնելու, թե ինչպես են կառավարությունները տարիներ շարունակ իրենց քաղաքականությունների միջոցով կրճատել և սահմանափակել կանանց իրավունքները: Ամեն անգամ առիթը բաց չթողնելով՝ նա նշում է, որ կանանց պայքարում հույս է տեսնում՝ անվերապահորեն հավատալով, որ մինչ օրս դժվար պայքարով ձեռք բերված իրավունքները հնարավոր կլինի պաշտպանել շնորհիվ կանանց քաջության և վճռականության: